औरंगाबाद : घाटी रुग्णालयात येणाऱ्या रुग्णांतील गरजूंना आवश्‍यक मदत आणि घाटीला दान करू इच्छिणाऱ्या दात्यांत समन्वयासाठी स्वतंत्र व्हॉट्‌सऍप ग्रुप कार्यान्वित करणार आहोत. याशिवाय अपघात विभागाजवळ "माणुसकीचा हात' असा स्वतंत्र कक्ष सुरू करण्याची संकल्पना असल्याचे प्रभारी अधिष्ठाता डॉ. कैलास झिने यांनी सांगितले.

गुरुवारी सकाळी साडेदहा वाजता अधिष्ठातांच्या दालनात शहरातील काही अशासकीय संस्था, सेवाभावी संस्था, डोनर्सचे प्रतिनिधी व व्यक्ती यांनी प्रभारी अधिष्ठाता डॉ. कैलास झिने, वैद्यकीय अधीक्षक डॉ. सुरेश हरबडे यांची भेट घेतली. यावेळी डॉ. हरबडे यांच्या वैद्यकीय अधीक्षकपदाच्या नियुक्तीबद्दल त्यांचा सत्कार केला. होली हेल्पिंग हॅन्डचे अकबर भाई यांनी एनजीओ आणि डोनरला सोबत घेऊन अधिष्ठाता यांची भेट घेतली.

हेही वाचा : मराठा क्रांती मोर्चाचे जोडे मारो आंदोलन   

यावेळी घाटीतील समाजसेवा, रक्तदान याबाबत चर्चा केली. यावेळी रुग्णालयात माणुसकीचा हात असा स्वतंत्र कक्ष उभारण्याची मनोदय व्यक्त केला. यात रुग्णांसंबंधी गरज असलेले साहित्य, मेडिसीन व इतर वस्तू रुग्णांना मदत होणाऱ्या गोष्टी दात्यांकडून उपलब्ध करून देण्याचा प्रयत्न असेल.

वैद्यकीय अधीक्षक डॉ. सुरेश हरबडे यांनी गरीब रुग्णांना, निराधार रुग्णांना इमर्जन्सीच्या वेळेस वेळेवर इंजेक्‍शन, औषधे मिळून देण्यासाठी मदतीचे आवाहन केले. बैठकीला डॉ. अनिल जोशी डॉ. संजय गवई, उपअधीक्षक डॉ. विकास राठोड, डॉ. संजय वाकुडकर, श्‍याम वाकळे, संदीप भडांगे, नरेंद्र भालेराव, शलाका व्यवहारे, अनुसया घोगरे, संतोष पवार, लक्ष्मीकांत शिंगोटे उपस्थित होते.